Dr John Ademilua

Yn wreiddiol o Nigeria, astudiodd John sŵoleg gyntaf, cyn symud i feddygaeth. Ymgartrefodd John yng Nghymru yn ddiweddarach a daeth o hyd i gymuned fywiog y mae bellach yn ei alw'n gartref iddo. Ar hyn o bryd yn gweithio mewn meddygfa yn Llanymddyfri, Sir Gaerfyrddin - cyn iddo ddechrau ar ei flwyddyn olaf o gylchdro.  

Yn ôl John:  

"Er fy mod eisiau astudio meddygaeth ar ôl gadael yr ysgol uwchradd, roedd hi'n anodd iawn cael eich derbyn i gwrs meddygol. Felly, dywedwyd wrthyf pe bawn i'n gwneud yn dda mewn sŵoleg yn fy mlwyddyn gyntaf, yna gallwn newid i feddygaeth yn nes ymlaen. Yn anffodus, ni ddilynwyd y cytundeb hwn, felly penderfynais orffen fy ngradd sŵoleg gan ei fod yn caniatáu mynediad llawer haws i feddygaeth wedyn drwy fynediad uniongyrchol.  

"Ar ôl treulio ychydig flynyddoedd fel swyddog meddygol, sef yr hyn rydyn ni'n ei alw'n “feddyg heb arbenigedd” yn Nigeria, penderfynais arbenigo mewn ymarfer cyffredinol, gan fy mod yn hoff iawn o'r ddeinameg a'r amrywiaeth yn y swydd honno. Treuliais 6 mis yn hyfforddi yn y swydd yn Nigeria cyn symud i'r DU, ond mae ganddyn nhw isafswm o bum mlynedd o hyfforddiant, sy'n eithaf gwahanol i'r DU.   

"Pan gyrhaeddais y DU am y tro cyntaf, es i i Gaergrawnt a gweithio mewn ysbytai preifat yn Lloegr. Fodd bynnag, pan ddechreuais ddatblygu fy nealltwriaeth a'm gwybodaeth am Gymru, sylweddolais fod cost byw yn llawer gwell na rhannau eraill o'r DU, gyda chefn gwlad anhygoel, mynyddoedd a golygfeydd hyfryd. Mae gen i ewythr hefyd sy'n feddyg yn y DU, a chynghorodd fi y byddai Cymru'n ddewis gwych. Mae Cymru'n fy atgoffa o ble roeddwn i'n byw yn Nigeria mewn sawl ffordd, gan fod yr amgylcheddau cymdeithasol yn debyg o ran ei fod yn dawel ac yn wledig, sydd wir yn apelio ataf fel dyn teulu, oherwydd ffordd o fyw dymunol yr oeddwn wedi arfer ag ef. 

"Yn ddiweddar, rwyf wedi cwblhau cylchdroadau yn Ysbyty Glangwili mewn pediatrig ac rwyf hefyd wedi cyflawni cylchdro meddyg teulu yn Rhydaman. Ar hyn o bryd rwy'n gweithio mewn meddygfa yn Llanymddyfri ac rwyf wedi bod yma ers tua phum mis bellach, cyn symud i feddygfa arall, lle byddaf yn treulio fy mlwyddyn olaf.  

"Rwy'n wirioneddol hapus ac wedi ymgartrefu yn yr ardal rydw i ynddi ar hyn o bryd, gan fy mod wedi adeiladu bywyd yma ac wedi dod o hyd i eglwys anhygoel, sy'n rhywbeth sy'n hynod bwysig i mi. 

"Rwyf wedi mwynhau fy hyfforddiant yng Nghymru yn fawr, gan ei fod wedi rhoi'r hyder imi gerdded i mewn i unrhyw leoliad proffesiynol a theimlo fy mod yn perthyn. Cymerodd ychydig o amser i mi addasu i'r gwahanol arddulliau o leoliadau meddygol; fel yn Nigeria, mae'n ymwneud â bod yn uwch feddyg, ac os nad ydych yn uwch,  yna weithiau gellir gwneud i chi deimlo fel nad ydych yn gwybod unrhyw beth. Ond yma yng Nghymru, mae uwch feddygon yn eich annog i siarad, dal y drws ar agor i chi a'ch helpu i feithrin eich gwybodaeth a'ch hyder yn bersonol.  
 
"O ran hobïau, dwi wrth fy modd yn chwarae gemau gyda'm teulu , ymarfer fy nghelf, yn ogystal â chwarae'r drymiau a'r piano yn yr eglwys. Rydym hefyd wrth ein bodd yn mynd allan i'r bwytai ac amgueddfeydd lleol anhygoel.  

"Byddwn wir yn argymell dod i Gymru i weithio a byw os ydych chi'n unrhyw beth fel fi ac yn mwynhau bywyd heddychlon, wedi'i lenwi â natur a chymuned groesawgar. Roeddwn i'n gweld y cynllun meddyg teulu ei hun yn gefnogol ac yn hyblyg iawn a byddwn yn ei argymell yn gryf i unrhyw un yn yr un math o sefyllfa roeddwn i ynddi.  

"Wrth edrych tuag at y dyfodol, ar ôl i mi orffen fy hyfforddiant meddyg teulu, rwy'n gobeithio dod yn hyfforddwr fy hun a helpu i arwain y genhedlaeth nesaf. Yn fy mywyd personol, rwy'n gobeithio cael teulu mawr a hapus a pharhau i fyw a gweithio yng Nghymru."