Rhian Chalk
Ganwyd Rhian yn Llanelwy yng Ngogledd Cymru a mae bellach yn byw ym Mae Colwyn. Roedd Rhian yn gweithio fel gweithiwr cymorth gofal iechyd seiciatrig, cyn iddi wneud y penderfyniad yn ddiweddarach i ddod yn nyrs iechyd meddwl – swydd y bu ynddi am y 12 mlynedd diwethaf.
Dywed Rhian:
"Dechreuais ymddiddori mewn iechyd meddwl yn weddol ifanc, gan fod fy mam yn ddirprwy reolwr mewn cartref preswyl seiciatrig, lle bûm yn gweithio gyda hi i ennill profiad yn y maes. Sylweddolais fod stigma tuag at bobl â chyflyrau iechyd meddwl a bod rhai pobl yn cael llai o gyfleoedd nag eraill oherwydd eu diagnosis. Roeddwn i eisiau helpu i newid y naratif a gobeithio gwneud ychydig o wahaniaeth, felly penderfynais ddilyn yr hyfforddiant angenrheidiol i ennill gradd nyrsio ym Mhrifysgol Bangor. Roedd llawer o fanteision o astudio ac aros yng Nghymru, megis derbyn grantiau ychwanegol i fy helpu gyda fy astudiaethau.
"Dechreuais fy ngyrfa yn gweithio yn yr uned cleifion mewnol acíwt gyda merched sydd wedi cael eu derbyn i'r ysbyty. Arhosais yno am tua 18 mis yn rôl Nyrs Staff band 5, nes bod cyfle i gael swydd band 6 dros dro, fel Dirprwy Reolwr Ward. Treuliais 12 mis yn y rôl honno, cyn i mi gael contract parhaol. Rwyf wedi bod yn ffodus i weithio fel Dirprwy Reolwr Ward ac yn rôl y Nyrs ar Ddyletswydd (Uwch Nyrs ar gyfer yr uned y tu allan i oriau). Tu allan i waith, rydw i’n goruchwylio Sgwadron Cadetiaid Awyr yr Awyrlu Brenhinol lleol yn y rôl Gwirfoddolwr Oedolion y Llu Cadetiaid sydd wedi fy ngalluogi i gwblhau hyfforddiant ychwanegol i weithio fel Hyrwyddwr y Lluoedd Arfog yn fy ngweithle. Rwyf hefyd wedi symud i faes recriwtio ac yn helpu i gefnogi'r Bwrdd Iechyd lleol i recriwtio gwahanol ddisgyblaethau, gan ganolbwyntio'n benodol ar recriwtio i nyrsio iechyd meddwl fel llysgennad iechyd meddwl. Rwy’n angerddol am gynyddu ymwybyddiaeth o iechyd meddwl, lleihau stigma, chwalu ystrydebau a helpu pobl i ddeall yn well yr effaith y gall salwch meddwl ei chael ar unigolion a’u hanwyliaid, tra hefyd yn arwain wrth ddarparu gobaith a chefnogaeth.
"Rwy'n meddwl mai fy nghyflawniad mwyaf yn broffesiynol yw pan fyddaf yn gweld pobl yn gadael yr ysbyty yn teimlo'n well na phan gawsant eu derbyn. Mae’r profiad hwn wedi datblygu fy sgiliau a’m gwybodaeth fy hun ac yn rhoi’r cyfle i mi rannu’r rhain gyda staff iau a’u cefnogi yn eu datblygiad eu hunain. Rwyf hefyd wedi gallu ennill profiad sylweddol o weithio gyda phobl sydd ag ystod eang o wahanol broblemau a symptomau iechyd meddwl, gan ehangu fy natblygiad proffesiynol ymhellach.
"Mae gweithio yn GIG Cymru yn dod â llawer o fanteision, megis y swm sylweddol o gyfleoedd datblygu a hyfforddi sydd ar gael. Fe'ch anogir yn fawr i gymryd unrhyw feysydd ychwanegol yr hoffech eu harchwilio a dilyn eich llwybr gyrfa personol. Rwyf hyd yn oed wedi cael y cyfle i siarad mewn ysgolion i helpu i ysbrydoli’r genhedlaeth nesaf a hefyd i gefnogi GIG Cymru drwy gymryd rhan mewn ymgyrch recriwtio. Roedd fy ngweithle yn hynod gefnogol i’r ymgyrch hon, a rhoddodd yr hyblygrwydd i mi gymryd rhan yn ôl yr angen.
"Rwy’n teimlo’n hynod ffodus i fyw ym Mae Colwyn yng Ngogledd Cymru, sydd ddim ond 5 munud ar droed o’r traeth harddaf a welwch erioed. Mae’n wych i deuluoedd ac ymarfer corff, ac rydw i wir yn mwynhau ymuno â grwpiau ymarfer corff lleol yn yr ardal. Os ydych chi eisiau rhywbeth ychydig yn fwy heriol, mae mynyddoedd Gogledd Cymru ychydig bellter i ffwrdd hefyd. Mae cymaint o dirweddau amrywiol yn yr ardal hon gan gynnwys llynnoedd a dyffrynnoedd, sy'n helpu i'w wneud yn lle anhygoel i fyw, yn enwedig os ydych chi'n cael diwrnod hir ac angen bach o ryddhad.
"Os oes angen newid cyflymder arnoch ac eisiau ymweld â dinas fawr, yna mae Lerpwl a Manceinion gerllaw, ac yn cynnig siopa bywiog, diwylliant a bywyd nos, yn ogystal â meysydd awyr rhyngwladol ar gyfer teithiau hirach. Mae cysylltiadau trafnidiaeth lleol hefyd yn wych, ac yn caniatáu ichi deithio i'r dinasoedd yn gyflym ac yn hawdd.
"Un peth mae pobl wastad yn gofyn i mi ydy os oes rhaid siarad Cymraeg i weithio yng Nghymru. Tra bod GIG Cymru yn gefnogol iawn i helpu i ddatblygu’r Gymraeg, nid yw’n gwbl angenrheidiol siarad Cymraeg i weithio yma. Fodd bynnag, fel Cymraes balch, rydw i wedi dysgu’r iaith a nawr gallaf hyd yn oed ei defnyddio’n ddyddiol. Mae GIG Cymru yn cynnig cyrsiau iaith os ydych yn dymuno dysgu neu ddatblygu sgiliau iaith sydd eisoes yn bodoli os yw'n rhywbeth yr hoffech roi cynnig arno, sy'n rhoi boddhad mawr ac yn hwyl i mi.
"Mae byw yng Nghymru yn fy ngalluogi i gael cydbwysedd rhyfeddol rhwng bywyd a gwaith, sy'n bwysig yn fy marn i. Mae gen i swydd anhygoel gyda phobl wych o'm cwmpas ac yn gweithio mewn sefydliad anhygoel. Mae’r wlad hardd, y golygfeydd a’r gweithgareddau yn gwneud Cymru yn lle mor wych i fyw a gweithio ynddo. Ni allwn argymell unrhyw le gwell.
"Yn y dyfodol, rwy’n gweld fy hun yn parhau i weithio i GIG Cymru ac yn byw yn yr un ardal. Yn ddelfrydol, hoffwn ddod yn nyrs fwy cyflawn trwy ddatblygu fy hun yn broffesiynol. Rwy’n anelu at gyflawni hyn drwy ddatblygu fy sgiliau meddwl yn feirniadol, gallu i addasu, deallusrwydd emosiynol a sgiliau arweinyddiaeth er mwyn gwella fy ngwybodaeth nyrsio, ac yn y pen draw sicrhau fy mod bob amser yn rhoi’r gofal o’r ansawdd gorau posibl i’m cleifion. Nid oes gennyf unrhyw amheuaeth y bydd GIG Cymru a’m Bwrdd Iechyd yn gwneud popeth posibl i wneud i hynny ddigwydd. Ar hyn o bryd, rwy'n mwynhau'r rôl yr wyf ynddi ar hyn o bryd, ac yn anelu at barhau i helpu fy nghleifion i wella."